സൗരയൂഥത്തിലെ ഏറ്റവും വലിയ ചന്ദ്രൻ - ഗാനിമേഡ് - ചിത്രം പകർത്തി ജൂനോ! |Images of north pole of Ganymede - Juno

-
സൗരയൂഥത്തിലെ ഏറ്റവും വലിയ ചന്ദ്രന്റെ ചിത്രം പകർത്തി ജൂനോ!

ഗാനിമേഡിന്റെ ഉത്തരധ്രുവം!കടപ്പാട്: NASA/JPL-Caltech/SwRI/ASI/INAF/JIRAM

സൗരയൂഥത്തിലെ ഏറ്റവും വലിയ ചന്ദ്രൻ. സിലിക്കേറ്റ് പാറയും ഐസും നിറഞ്ഞ പ്രതലം. ഒരുപക്ഷേ ഭൂമിയിലെ എല്ലാ കടലുകളിലും ഉള്ളതിനെക്കാൾ കൂടുതൽ ജലം ഉള്ള ഇടം. അതാണ് ഗാനിമേഡ് എന്ന ഉപഗ്രഹം. വ്യാഴത്തിന്റെ ഏറ്റവും വലിയ ഉപഗ്രഹം. വ്യാഴത്തിന്റെ മാത്രമല്ല, സൗരയൂഥത്തിലെ തന്നെ ഏറ്റവും വലിയ ഉപഗ്രഹമാണത്. ബുധനെക്കാളും വലിയ ഒരു ഉപഗ്രഹം!
ആ ഗാനിമേഡിന്റെ ധ്രുവപ്രദേശത്തിന്റെ ചിത്രം പകർത്തിയിരിക്കുകയാണ് ജൂനോ. വ്യാഴത്തെക്കുറിച്ചു പഠിക്കാൻ വിക്ഷേപിച്ച പേടകമാണത്. വ്യാഴത്തിന്റെ നിരവധി ക്ലോസ്അപ്പ് ചിത്രങ്ങൾ ഇതിനകം ജൂനോ നമുക്കു തന്നിട്ടുണ്ട്. അതിനൊപ്പമാണ് ഇപ്പോൾ ഗാനിമേഡിന്റെ ചിത്രവും കിട്ടിയിരിക്കുന്നത്. കഴിഞ്ഞ വർഷം ഡിസംബർ 26നാണ് ജൂനോ ചിത്രം പകർത്തിയത്. തന്റെ ഇൻഫ്രാറെഡ് ക്യാമറ (Jovian Infrared Auroral Mapper (JIRAM)) ഉപയോഗിച്ചായിരുന്നു ഫോട്ടോയെടുക്കൽ. ഗാനിമേഡിൽനിന്ന് ഏതാണ്ട് ഒരു ലക്ഷം കിലോമീറ്റർ അകലെയായിരുന്നു ജൂനോ അപ്പോൾ.
കാര്യമായ അന്തരീക്ഷം ഒന്നുമില്ലാത്ത ഉപഗ്രഹമാണ് ഗാനിമേഡ്. എന്നാൽ സ്വന്തമായി നല്ലൊരു കാന്തികമണ്ഡലം ഉണ്ട്. സൗരയൂഥത്തിലെ മറ്റൊരു ഉപഗ്രഹത്തിനും ഇത്രയും മികച്ച കാന്തികമണ്ഡലം ഇല്ല. അന്തരീക്ഷമില്ലാത്തതിനാൽ വ്യാഴത്തിൽനിന്ന് വരുന്ന റേഡിയേഷനും പ്ലാസ്മയുമെല്ലാം ഗാനിമേഡിനെ നിരന്തരം ആക്രമിക്കുന്നുണ്ട്. കാന്തികമണ്ഡലത്തിന്റെ സ്വാധീനത്തിൽപ്പെട്ടാണ് വ്യാഴത്തിൽനിന്ന് വരുന്ന കണങ്ങൾ ഗാനിമേഡിൽ എത്തുന്നത്. അതിനാൽ ഗാനിമേഡിന്റെ ഉപരിതലത്തെക്കുറിച്ചു പഠിക്കാൻ ശാസ്ത്രജ്ഞർക്ക് പ്രത്യേക താത്പര്യവും ഉണ്ട്.

ഗാനിമേഡിന്റെ വടക്കേധ്രുവം -വിവിധ ചിത്രങ്ങൾ - കടപ്പാട്: NASA/JPL-Caltech/SwRI/ASI/INAF/JIRAM

1610ൽ ഗലീലിയോ ഗലീലി ആണ് ഗാനിമേഡിനെ കണ്ടെത്തുന്നത്. അന്നുതൊട്ട് ഇന്നുവരെ ഗാനിമേഡും വാനനിരീക്ഷകരുടെയും ശാസ്ത്രജ്ഞരുടെയും ഇഷ്ടവിഷയങ്ങളിലൊന്നാണ്. 5000കിലോമീറ്ററിലേറെ വലിപ്പമുണ്ട് ഈ ഗോളത്തിന്. നമ്മുടെ ചന്ദ്രന്റെ ഒന്നര ഇരട്ടി വലിപ്പവും രണ്ട് ഇരട്ടി മാസുമുണ്ട് ഗാനിമേഡിന്.

ഗാനിമേഡ്. ഗലീലിയോ പേടകം എടുത്ത ചിത്രം.
കടപ്പാട്: NASA/JPL
പയനിയർ മിഷൻ മുതൽ ഗാനിമേഡിനെ നമ്മൾ പഠിക്കുന്നുണ്ട്. പയനിയർ 10 എടുത്ത തികച്ചും അവ്യക്തമായ ഫോട്ടോയാണ് ഗാനിമേഡിനെക്കുറിച്ചുള്ള പഠനത്തെ കൂടുതൽ രസകരമാക്കിയത്. വോയേജർ ദൗത്യങ്ങളും ഗാനിമേഡിനെക്കുറിച്ച് കൂടുതൽ വിവരങ്ങൾ തന്നിരുന്നു. എന്നിരുന്നാലും ഗാനിമേഡിന്റെ മികച്ച ചിത്രങ്ങൾ നമുക്കു തന്നത് ഗലീലിയോ എന്ന പേടകമാണ്. 1989ലാണ് ഗലീലിയോ വിക്ഷേപിക്കുന്നത്. 1995ൽ ഇത് വ്യാഴത്തിന്റെ അടുത്തെത്തി. വ്യാഴത്തിനു ചുറ്റും പരിക്രമണം നടത്തുന്ന ആദ്യ കൃത്രിമോപഗ്രഹമായി മാറി. ഗാനിമേഡിന്റെ ഏറ്റവും മികച്ച ചിത്രമായി ഇന്നും നമുക്കുള്ളത് ഗലീലിയോ എടുത്ത ചിത്രമാണ്.


ജൂനോ എടുത്ത ചിത്രങ്ങൾ വരുംകാല പര്യവേക്ഷണങ്ങളെ സഹായിക്കും എന്ന് ഉറപ്പാണ്. ഗാനിമേഡിനെക്കുറിച്ചും വ്യാഴത്തെക്കുറിച്ചുമെല്ലാം പഠിക്കുന്ന അടുത്ത പേടകം 2030ലാവും ഇനി അവിടെയെത്തുക. നാസയുടെയും യൂറോപ്യൻ സ്പേസ് ഏജൻസിയുടെയും സംയുക്ത സംരംഭം ആയിട്ടാണ് ഈ പദ്ധതി വിഭാവനം ചെയ്തിരിക്കുന്നത്. Europa Jupiter System Mission – Laplace (EJSM/Laplace) എന്നാണ് ഈ പദ്ധതിയുടെ പേര്. യൂറോപ്യൻ സ്പേസ് ഏജൻസിയുടെ Jupiter Ganymede Orbiter (JGO) എന്ന പ്രോബും ഇതിലുണ്ടാവും. ഗാനിമേഡിനെ ചുറ്റിസഞ്ചരിച്ച് അതിനെക്കുറിച്ചു പഠിക്കലാവും JGOയുടെ പണി!

---നവനീത്...

പോസ്റ്റ് ലിങ്ക്:https://www.nscience.in/2020/07/images-of-north-pole-of-ganymede-juno.html


ഗാനിമേഡിന്റെ ത്രിമാനമാതൃക!

മൗസ് ഉപയോഗിച്ച് കറക്കിനോക്കൂ.


Comments

Post a Comment

Popular posts from this blog

എങ്ങനെ നിങ്ങൾക്കും ചൊവ്വയിലിറങ്ങി ഫോട്ടോയെടുക്കാം. ഇതാ അവസരം!

-
Image
ചൊവ്വയിലേക്ക് പെർസിവയരൻസ് എന്ന വാഹനം പോകുന്നത് അടുത്ത മാസമാണ്. പിന്നെയും മാസങ്ങൾ കഴിഞ്ഞ് അടുത്ത വർഷമേ അത് ചൊവ്വയിലെത്തൂ. പക്ഷേ നമുക്ക് ചൊവ്വയിലേക്ക് ഇപ്പോൾത്തന്നെ പോവാൻ നാസ അവസരമൊരുക്കിയിരിക്കുകയാണ്. ചൊവ്വയുടെ മണ്ണിൽ കാൽകുത്താനുള്ള മനുഷ്യരുടെ ത്വരയെ നാസയ്ക്കു കാണാതിരിക്കാനാവില്ലല്ലോ. ചൊവ്വയിൽപ്പോവാൻ പേടിയുള്ളവർക്ക് ചൊവ്വയിലേക്കുള്ള വിക്ഷേപണം കാണാനും ഒബ്സർവേഷൻ സെന്ററിൽ ഇരുന്ന് വിക്ഷേപണത്തെ നിയന്ത്രിക്കാനും ഒക്കെ അവസരമുണ്ട്. കൊറോണ ആയതിനാൽ ആകെക്കൂടി ചെയ്യേണ്ടത് വീട്ടിലിരിക്കുക. എന്നിട്ട് നെറ്റിൽക്കയറി ദാ ഈ സൈറ്റ് തുറക്കുക. https://mars.nasa.gov/mars2020/participate/photo-booth/ അവിടെ നിങ്ങളുടെ ഫോട്ടോ അപ്‍ലോഡ് ചെയ്യുക. ഇഷ്ടമുള്ള പശ്ചാത്തലം തിരഞ്ഞെടുക്കുക. പെർസിവിയറൻസ് ചൊവ്വയിൽ എത്തുന്നതിനു മുന്നേതന്നെ അതിനൊപ്പം ഫോട്ടോയെടുക്കാൻ അവസരമൊരുങ്ങും! ങ്ങാ, പിന്നെ ഒരു കാര്യം കൂടി. പെർസിവിയറൻസിലേറി ചൊവ്വയിലെത്തുന്നത് ഒരു കോടി മനുഷ്യരുടെ പേരുകളും പേറിയാണ്. എല്ലാവരുടെ പേരും കൊത്തിയ ചെറിയ ചിപ്പുകൾ ഈ പേടകത്തിൽ ഉണ്ട്. അന്ന് അയയ്ക്കാൻ വിട്ടുപോയവർക്ക് 2026ലെ പേടകത്തിൽ വീണ്ടും ചൊവ്വയിലെത്താം. ആ ടിക്കറ്റി
Read more

ഇതാണു മക്കളേ ശുക്രന്റെ ഫോട്ടോ! ആറു മണിക്കൂര്‍ ക്യാമറ തുറന്നുവച്ച് എടുത്ത ഫോട്ടോ!

-
Image
ചിത്രത്തിനു കടപ്പാട്: NASA/MPE/K.Dennerl et al. ഈ ചിത്രം എന്താണെന്നറിയാമോ? ഇതാണു ശുക്രന്‍ എന്ന ഗ്രഹം! ങേ? ഞെട്ടിയോ? നാം ഇതുവരെ കണ്ട ശുക്രന്‍ ഇങ്ങനെയല്ലായിരുന്നല്ലോ എന്നാവും ചിന്ത! ശരിയാണ് നാം ഇതുവരെ കണ്ടിട്ടുള്ള ശുക്രന്റെ ചിത്രം ഇങ്ങനെയേ അല്ല! പക്ഷേ ഇതും ശുക്രന്റെ ചിത്രമാണ്. ആറ് മണിക്കൂര്‍ ക്യാമറയും തുറന്നുവച്ച് കഷ്ടപ്പെട്ട് എടുത്ത ചിത്രം! ബഹിരാകാശത്ത് നാസ സ്ഥാപിച്ചിട്ടുള്ള ചന്ദ്ര എക്സ്-റേ ഒബ്സര്‍വേറ്ററി എടുത്ത ചിത്രമാണിത്. എക്സ്-റേയെ മാത്രം കാണാന്‍ കഴിയുന്ന ഒരു ടെലിസ്കോപ്പാണ് ചന്ദ്ര-എക്സ്-റേ ഒബ്സര്‍വേറ്ററി. ഈ ടെലിസ്കോപ്പ് 2001 ജനുവരി 10, 13 തീയതികളില്‍ ശുക്രനെ നിരീക്ഷിച്ച് എടുത്ത ചിത്രമാണ് കുറെ ചെറിയ കുത്തു കുത്തുകള്‍ മാത്രമായി ഇപ്പോള്‍ കണ്ടത്. അതെന്താ അങ്ങനെ എന്നല്ലേ? സംഗതി ലളിതമാണ്. ശുക്രനില്‍നിന്നു വരുന്ന എക്സ്-റേ രശ്മികളെ മാത്രം ഉപയോഗിച്ചാണ് ഈ ഫോട്ടോ ഉണ്ടാക്കിയിരിക്കുന്നത്. ശുക്രനില്‍നിന്നും വരുന്ന എക്സ് രശ്മികളുടെ അളവ് വളരെ വളരെ കുറവും ആണ്. അതാണ് ആറു മണിക്കൂര്‍ ക്യാമറ തുറന്നുവച്ച് ഫോട്ടോയെടുത്തിട്ടും ഇത്രയും അപൂര്‍ണ്ണമെന്നു തോന്നിയ ഒരു ചിത്രം കിട്ടിയത്.
Read more

സൂഷ്മലോകത്തിലേക്കുള്ള മൂന്നാം കണ്ണ് - മൈക്രോസ്കോപ്പ് എന്ന സൂഷ്മദര്‍ശിനി

-
Image
സൂഷ്മലോകത്തിലേക്കുള്ള മൂന്നാം കണ്ണ് -  മൈക്രോസ്കോപ്പ് പുല്‍ക്കൊടിത്തുമ്പില്‍ നില്‍ക്കുന്ന വെള്ളത്തുള്ളിയായിരിക്കണം ഒരു പക്ഷേ മനുഷ്യന്‍ കണ്ട ആദ്യ സൂഷ്മദര്‍ശിനി. ഇലയുടെ കുറച്ചുകൂടി വലിയ ചിത്രം ആ ജലത്തുള്ളി കാണിച്ചുകൊടുത്തിട്ടുണ്ടാവണം. ഏറ്റവും ലളിതമായ മൈക്രോസ്കോപ്പാണിത്. ഒരു ചില്ലിന്‍മേല്‍ ഒരു വെള്ളത്തുള്ളി വച്ച് നിങ്ങള്‍ക്കും ഈ ലളിതമായ മൈക്രോസ്കോപ്പ് നിര്‍മ്മിക്കാവുന്നതാണ്. ആരാണ് ആദ്യമൈക്രോസ്കോപ്പ് നിര്‍മ്മിച്ചത് എന്ന് ചോദിച്ചാല്‍ ഉത്തരം പറയാന്‍ ബുദ്ധിമുട്ടാണ്. കാരണം ഒരു ലെന്‍സ് മാത്രം ഉപയോഗിച്ച് ഒരു വസ്തുവിനെ നിരീക്ഷിച്ചാല്‍ ആ സംവിധാനത്തെ ഒരു മൈക്രോസ്കോപ്പ് എന്ന് വിളിക്കാം. രണ്ട് ലെന്‍സുകള്‍ ഉപയോഗിച്ച് വസ്തുക്കളെ കൂടുതല്‍ വലുതാക്കി കാണിക്കുന്ന കോംപൌണ്ട് മൈക്രോസ്കോപ്പ് എന്ന സംവിധാനം നിര്‍മ്മിച്ചത് ആരാണ് എന്നതു പോലും ഇന്ന് തര്‍ക്കവിഷയമാണ്. ഹാന്‍സ് ലിപ്പര്‍ഷെ, സക്കറിയാസ് ജാന്‍സണ്‍ എന്ന് തുടങ്ങി ഗലീലിയോ ഗലീലി വരെ ഈ പട്ടികയിലുണ്ട്. മൈക്രോസ്കോപ്പിന്റെ നിര്‍മ്മാണത്തില്‍ ഏറ്റവും പ്രധാനം ലെന്‍സുകളാണ്. പ്രകാശത്തെ ആവശ്യാനുസരണം നിയന്ത്രിച്ച് ഒരു വസ്തുവിന്റെ വലിപ്പമേറിയ പ്രതിബിംബം രൂപപ്പെടുത്തിയെടുക
Read more