പഴയ കെപ്ലര്‍ ഡാറ്റയില്‍നിന്ന് പുതിയൊരു ഗ്രഹം! അതും ഭൂമിയെപ്പോലെ ഒരു ഗ്രഹം! Kepler-1649c

-

പഴയ ഡാറ്റയില്‍നിന്ന് പുതിയൊരു ഗ്രഹം! അതും ഭൂമിയെപ്പോലെ ഒരു ഗ്രഹം!
കെപ്ലര്‍ 1649c എന്ന ഗ്രഹവും മാതൃനക്ഷത്രവും. ചിത്രകാരഭാവന.
കടപ്പാട്: NASA/Ames Research Center/Daniel Rutter

കെപ്ലര്‍ എന്ന ബഹിരാകാശടെലിസ്കോപ്പ് വിരമിച്ചിട്ട് രണ്ടു വര്‍ഷത്തോളമായി. സൗരയൂഥത്തിനു പുറത്തുള്ള ഗ്രഹങ്ങളെ കണ്ടെത്തലായിരുന്നു കെപ്ലറുടെ ദൗത്യം.  വിരമിച്ച് രണ്ടുവര്‍ഷത്തിനുശേഷം കെപ്ലര്‍ ടെലിസ്കോപ്പിലെ ഡാറ്റയില്‍നിന്ന് പുതിയൊരു ഗ്രഹത്തെക്കൂടി കണ്ടെത്തിയിരിക്കുന്നു ശാസ്ത്രജ്ഞര്‍. അതും ഭൂമിയെപ്പോലെ ഒരു ഗ്രഹത്തെ. ജലം ജലമായിത്തന്നെ നിലനില്‍ക്കാന്‍ സാധ്യതയുള്ള ഒരു ഗ്രഹത്തെ!
Kepler-1649c എന്നാണ് ഈ ഗ്രഹത്തിനു പേരിട്ടിരിക്കുന്നത്. കെപ്ലര്‍ നമുക്കു നല്‍കിയ ഡാറ്റയെ ആദ്യം വിശകലനം ചെയ്തപ്പോള്‍ ഈ ഗ്രഹം നമ്മുടെ ശ്രദ്ധയില്‍പ്പെട്ടിരിക്കുന്നില്ല. വലിയ ഡാറ്റയാണ് കെപ്ലര്‍ നമുക്കു നല്‍കിയിരിക്കുന്നത്. അതില്‍ എന്തായാലും പല ഗ്രഹങ്ങളും മറഞ്ഞുകിടപ്പുണ്ടാവണം. അതിനാല്‍ത്തന്നെ ശാസ്ത്രജ്ഞര്‍ വെറുതെയിരുന്നില്ല. കെപ്ലര്‍ നല്‍കിയ ഡാറ്റയില്‍ വീണ്ടും വീണ്ടും പരിശോധനകള്‍ തുടര്‍ന്നുകൊണ്ടിരുന്നു. ഇപ്പോഴും അത്തരം വിശകലനങ്ങള്‍ പലരും തുടരുന്നുമുണ്ട്. അങ്ങനെയാണ് പഴയ ഡാറ്റയില്‍ മറഞ്ഞുകിടന്നിരുന്ന ഒരു ഭൂമിയെ നമുക്ക് കണ്ടെത്താനായത്.

ഭൂമിയെക്കാള്‍ അല്പം വലുതാണ് ഈ ഗ്രഹം. ഭൂമിക്ക് സൂര്യനില്‍നിന്ന് കിട്ടുന്ന സൂര്യപ്രകാശത്തിന്റെ 75% മാത്രം പ്രകാശമേ പക്ഷേ ഈ പുതിയ ഗ്രഹത്തില്‍ ലഭിക്കുന്നുള്ളൂ. വലിപ്പം കൊണ്ടും താപനിലകൊണ്ടും ഭൂമിക്കു സമാനമായ ഗ്രഹമാണെങ്കിലും അടുത്ത കാലത്തൊന്നും നമുക്ക് അവിടെ എത്താനാവില്ല.  300പ്രകാശവര്‍ഷം അകലെയാണ് പുതിയ ഗ്രഹം. പ്രകാശത്തിന്റെ വേഗതയില്‍ സഞ്ചരിച്ചാല്‍പ്പോലും 300വര്‍ഷം വേണം അവിടെയെത്താന്‍.

ഭൂമിയും പുതിയ ഗ്രഹവും ഒരു താരതമ്യം. ചിത്രകാരഭാവന.
കടപ്പാട്: NASA/Ames Research Center/Daniel Rutter
ചുവപ്പുകുള്ളന്‍ (Red dwarf ) എന്ന വിഭാഗത്തില്‍പ്പെടുന്ന ചെറിയ നക്ഷത്രത്തെയാണ് ഈ ഗ്രഹം പരിക്രമണം ചെയ്യുന്നത്. സൂര്യനെക്കാള്‍ ചെറിയ നക്ഷത്രമാണിത്. എന്നാല്‍ ഇത്തരം നക്ഷത്രങ്ങള്‍ സ്റ്റെല്ലാര്‍ ഫ്ലെയറുകള്‍ എന്നറിയപ്പെടുന്ന പ്രതിഭാസങ്ങള്‍ക്ക് സാധ്യതയുള്ളവയാണ്. അത്തരം ഫ്ലെയറുകള്‍ സമീപത്തുള്ള ഗ്രഹങ്ങളുടെ അന്തരീക്ഷത്തെ ഇല്ലാതാക്കാന്‍പോലും സാധ്യതയുണ്ട്. അങ്ങനെയെങ്കില്‍ ജീവനുള്ള സാധ്യത ഇപ്പോള്‍ കണ്ടെത്തിയ ഗ്രഹത്തിലും  ഉണ്ടാവണമെന്നില്ല.

കെപ്ലര്‍ 1649c എന്ന ഗ്രഹത്തിന്റെ ഉപരിതലവും മാതൃനക്ഷത്രവും. ചിത്രകാരഭാവന.
കടപ്പാട്: NASA/Ames Research Center/Daniel Rutter
ട്രാന്‍സിറ്റ് രീതി ഉപയോഗിച്ചാണ് കെപ്ലര്‍ ടെലിസ്കോപ്പ് ഗ്രഹങ്ങളെ കണ്ടെത്തുന്നത്. നക്ഷത്രത്തെ നിരീക്ഷിക്കുന്നതിനിടയില്‍ ഏതെങ്കിലും ഗ്രഹം നക്ഷത്രത്തിനു മുന്നിലൂടെ സഞ്ചരിച്ചാല്‍ നക്ഷത്രത്തില്‍നിന്ന് വരുന്ന പ്രകാശത്തിന് അല്പം കുറവുണ്ടാകും. വളരെ വളരെ നേരിയ ഒരു കുറവ്. ഈ വ്യത്യാസം കണ്ടെത്താന്‍ ഇപ്പോഴുള്ള ആധുനിക ഉപകരണങ്ങള്‍ക്ക് കഴിയും. എത്രത്തോളം പ്രകാശം കുറഞ്ഞു എന്നതിനെ ആശ്രയിച്ചാണ് ഗ്രഹത്തിന്റെ കൂടുതല്‍ വിവരം അറിയാന്‍ കഴിയും.

---നവനീത്...


Comments

Post a Comment

Popular posts from this blog

എങ്ങനെ നിങ്ങൾക്കും ചൊവ്വയിലിറങ്ങി ഫോട്ടോയെടുക്കാം. ഇതാ അവസരം!

-
Image
ചൊവ്വയിലേക്ക് പെർസിവയരൻസ് എന്ന വാഹനം പോകുന്നത് അടുത്ത മാസമാണ്. പിന്നെയും മാസങ്ങൾ കഴിഞ്ഞ് അടുത്ത വർഷമേ അത് ചൊവ്വയിലെത്തൂ. പക്ഷേ നമുക്ക് ചൊവ്വയിലേക്ക് ഇപ്പോൾത്തന്നെ പോവാൻ നാസ അവസരമൊരുക്കിയിരിക്കുകയാണ്. ചൊവ്വയുടെ മണ്ണിൽ കാൽകുത്താനുള്ള മനുഷ്യരുടെ ത്വരയെ നാസയ്ക്കു കാണാതിരിക്കാനാവില്ലല്ലോ. ചൊവ്വയിൽപ്പോവാൻ പേടിയുള്ളവർക്ക് ചൊവ്വയിലേക്കുള്ള വിക്ഷേപണം കാണാനും ഒബ്സർവേഷൻ സെന്ററിൽ ഇരുന്ന് വിക്ഷേപണത്തെ നിയന്ത്രിക്കാനും ഒക്കെ അവസരമുണ്ട്. കൊറോണ ആയതിനാൽ ആകെക്കൂടി ചെയ്യേണ്ടത് വീട്ടിലിരിക്കുക. എന്നിട്ട് നെറ്റിൽക്കയറി ദാ ഈ സൈറ്റ് തുറക്കുക. https://mars.nasa.gov/mars2020/participate/photo-booth/ അവിടെ നിങ്ങളുടെ ഫോട്ടോ അപ്‍ലോഡ് ചെയ്യുക. ഇഷ്ടമുള്ള പശ്ചാത്തലം തിരഞ്ഞെടുക്കുക. പെർസിവിയറൻസ് ചൊവ്വയിൽ എത്തുന്നതിനു മുന്നേതന്നെ അതിനൊപ്പം ഫോട്ടോയെടുക്കാൻ അവസരമൊരുങ്ങും! ങ്ങാ, പിന്നെ ഒരു കാര്യം കൂടി. പെർസിവിയറൻസിലേറി ചൊവ്വയിലെത്തുന്നത് ഒരു കോടി മനുഷ്യരുടെ പേരുകളും പേറിയാണ്. എല്ലാവരുടെ പേരും കൊത്തിയ ചെറിയ ചിപ്പുകൾ ഈ പേടകത്തിൽ ഉണ്ട്. അന്ന് അയയ്ക്കാൻ വിട്ടുപോയവർക്ക് 2026ലെ പേടകത്തിൽ വീണ്ടും ചൊവ്വയിലെത്താം. ആ ടിക്കറ്റി
Read more

ഇതാണു മക്കളേ ശുക്രന്റെ ഫോട്ടോ! ആറു മണിക്കൂര്‍ ക്യാമറ തുറന്നുവച്ച് എടുത്ത ഫോട്ടോ!

-
Image
ചിത്രത്തിനു കടപ്പാട്: NASA/MPE/K.Dennerl et al. ഈ ചിത്രം എന്താണെന്നറിയാമോ? ഇതാണു ശുക്രന്‍ എന്ന ഗ്രഹം! ങേ? ഞെട്ടിയോ? നാം ഇതുവരെ കണ്ട ശുക്രന്‍ ഇങ്ങനെയല്ലായിരുന്നല്ലോ എന്നാവും ചിന്ത! ശരിയാണ് നാം ഇതുവരെ കണ്ടിട്ടുള്ള ശുക്രന്റെ ചിത്രം ഇങ്ങനെയേ അല്ല! പക്ഷേ ഇതും ശുക്രന്റെ ചിത്രമാണ്. ആറ് മണിക്കൂര്‍ ക്യാമറയും തുറന്നുവച്ച് കഷ്ടപ്പെട്ട് എടുത്ത ചിത്രം! ബഹിരാകാശത്ത് നാസ സ്ഥാപിച്ചിട്ടുള്ള ചന്ദ്ര എക്സ്-റേ ഒബ്സര്‍വേറ്ററി എടുത്ത ചിത്രമാണിത്. എക്സ്-റേയെ മാത്രം കാണാന്‍ കഴിയുന്ന ഒരു ടെലിസ്കോപ്പാണ് ചന്ദ്ര-എക്സ്-റേ ഒബ്സര്‍വേറ്ററി. ഈ ടെലിസ്കോപ്പ് 2001 ജനുവരി 10, 13 തീയതികളില്‍ ശുക്രനെ നിരീക്ഷിച്ച് എടുത്ത ചിത്രമാണ് കുറെ ചെറിയ കുത്തു കുത്തുകള്‍ മാത്രമായി ഇപ്പോള്‍ കണ്ടത്. അതെന്താ അങ്ങനെ എന്നല്ലേ? സംഗതി ലളിതമാണ്. ശുക്രനില്‍നിന്നു വരുന്ന എക്സ്-റേ രശ്മികളെ മാത്രം ഉപയോഗിച്ചാണ് ഈ ഫോട്ടോ ഉണ്ടാക്കിയിരിക്കുന്നത്. ശുക്രനില്‍നിന്നും വരുന്ന എക്സ് രശ്മികളുടെ അളവ് വളരെ വളരെ കുറവും ആണ്. അതാണ് ആറു മണിക്കൂര്‍ ക്യാമറ തുറന്നുവച്ച് ഫോട്ടോയെടുത്തിട്ടും ഇത്രയും അപൂര്‍ണ്ണമെന്നു തോന്നിയ ഒരു ചിത്രം കിട്ടിയത്.
Read more

പൊടിക്കാറ്റ് - ഇൻസൈറ്റ് പ്രവർത്തനം അവസാനിപ്പിക്കുന്നു

-
Image
നാലുവർഷം നീണ്ട ഒറ്റ നിൽപ്പ്. നിന്ന നിൽപ്പിൽ ചെയ്തുകൂട്ടിയ പരാക്രമങ്ങൾ. എടുത്ത ഫോട്ടോകൾ. കേട്ടറിഞ്ഞ കുലുക്കങ്ങൾ... അങ്ങനെ ഒത്തിരിയുണ്ട് ഇൻസൈറ്റിനു പറയാൻ. പക്ഷേ നാലു വർഷത്തെ ഈ ദൗത്യത്തിന് അവസാനമാകുകയാണ്. ഇനിയൊരിക്കലും കണ്ണുതുറക്കാൻ കഴിയാത്തവിധം ഇൻസൈറ്റിലെ ഊർജ്ജോത്പാദനം നിലയ്ക്കുകയാണ്. 2018 നവംബറിലാണ് ഇൻസൈറ്റ് പേടകം ചൊവ്വയിലെത്തുന്നത്. Interior Exploration using Seismic Investigations, Geodesy and Heat Transport എന്നായിരുന്നു ഇദ്ദേഹത്തിന്റെ മുഴുവൻ പേര്. ചൊവ്വയും ഭൂമിയും ചന്ദ്രനുമെല്ലാം രൂപപ്പെട്ടത് ഏതാണ്ട് ഒരേ കാലയളവിൽ ആണെന്നാണ് കരുതുന്നത്. എന്നാൽ കാലാന്തരത്തിൽ ഇവരുടെ പരിണാമം വ്യത്യസ്തമായിരുന്നു. ഓരോ ഗോളവും വ്യത്യസ്തരീതിയിലായിരുന്നു സ്വന്തം ഉള്ളും അന്തരീക്ഷവും മാറ്റിക്കൊണ്ടിരുന്നത്. ഒരേ കാലഘട്ടത്തിൽ രൂപപ്പെട്ടിട്ടും എന്തുകൊണ്ടാണ് വ്യത്യസ്തരീതികളിൽ പരിണമിച്ചത് എന്ന ചോദ്യത്തിന് ഉത്തരം തേടിയാണ് ഇൻസൈറ്റ് ചൊവ്വയിലെത്തിയത്. അതിനായി ചൊവ്വയുടെ ഉള്ളിനെക്കുറിച്ച് ആഴത്തിൽ പഠിക്കണം. ഭൂകമ്പത്തിനു സമാനമായി ചൊവ്വയിലുണ്ടാകുന്ന കുലുക്കങ്ങളെക്കുറിച്ചു പഠിക്കണം. ചൊവ്വയുടെ ഉൾക്കാമ്പ്, മാന്റിൽ, പുറംപാളി എന്ന
Read more