ഒരു ബ്ലാക്ക്ഹോള്‍ കാണാന്‍ ‍ എങ്ങനെയായിരിക്കും?

ഒരു ബ്ലാക്ക്ഹോള്‍ കാണാന്‍ ‍ എങ്ങനെയായിരിക്കും? ഇവന്റ് ഹൊറൈസന്‍സ് ടെലിസ്കോപ്പ് ഉപയോഗിച്ച് ഒരു ബ്ലാക്ക്ഹോളിന്റെ ആദ്യ ചിത്രം പകര്‍ത്തിയതോടെ അക്കാര്യത്തില്‍ ആളുകള്‍ക്ക് ഒരു ധാരണയായി. ഒരുപക്ഷേ ഏറ്റവും കൂടുതല്‍ ആളുകള്‍ കണ്ട ചിത്രങ്ങളിലൊന്നാവും അത്.

ഇതിനു മുന്‍പ് ബ്ലാക്ക്ഹോളിനെ കമ്പ്യൂട്ടര്‍ സിമുലേഷനുകള്‍ ഉപയോഗിച്ച് ചിത്രീകരിക്കുകയായിരുന്നു പതിവ്. ഇന്റര്‍സ്റ്റെല്ലാര്‍ എന്ന സിനിമയില്‍ ഒരു ബ്ലാക്ക്ഹോളിന്റെ ചിത്രം കാണിക്കുന്നുണ്ട്. കമ്പ്യൂട്ടറുകള്‍ ഉപയോഗിച്ച് കണക്കുകളിലെ സൂത്രവാക്യങ്ങളിലൂടെ ശാസ്ത്രീയമായി തയ്യാറാക്കിയ ഒന്നായിരുന്നു അത്. ശരിക്കും ഒരു ശാസ്ത്രാന്വേഷണം ആ സിനിമയ്ക്കുവേണ്ടി അക്കാര്യത്തില്‍ നടത്തിയിരുന്നു. അതുകൊണ്ടു തന്നെയാണ് ഇന്റര്‍സ്റ്റെല്ലാര്‍ എന്ന സിനിമ നല്ലൊരു സയന്‍സ് ഫിക്ഷന്‍ ആയി വിലയിരുത്തുന്നതും.

കടപ്പാട്: NASA’s Goddard Space Flight Center/Jeremy Schnittman


ഒരു ബ്ലാക്ക്ഹോള്‍ എങ്ങനെയിരിക്കും എന്നത് മനസ്സിലാക്കാനായി നാസയും ഇതുപോലെ ഒരു ഉദ്യമം നടത്തിയിരുന്നു. ബ്ലാക്ക്ഹോളിന്റെ ഓരോ വശത്തുനിന്ന് നോക്കുമ്പോഴും അത് എങ്ങനെയായിരിക്കും എന്നത് കമ്പ്യൂട്ടര്‍സഹായത്തോടെ ചിത്രീകരിച്ചിരിക്കുകയാണ് നാസ.

ബ്ലാക്ക്ഹോളിന്റെ വശത്തുനിന്നുള്ള കാഴ്ച. കടപ്പാട്: NASA’s Goddard Space Flight Center/Jeremy Schnittman


അതിമനോഹരമാണ് അതിലെ ഓരോ ചിത്രീകരണം. ബ്ലാക്ക്ഹോളിനു ചുറ്റും പദാര്‍ത്ഥങ്ങള്‍ ചുറ്റിക്കറങ്ങുന്നതും അതില്‍നിന്നും വരുന്ന പ്രകാശം ബ്ലാക്ക്ഹോളിന്റെ അതിശക്തമായ ഗുരുത്വാകര്‍ഷണത്തില്‍പ്പെട്ട് വളഞ്ഞു സഞ്ചരിക്കുന്നതും എല്ലാം ഏറെ ആകര്‍ഷമായും ശാസ്ത്രീയമായും ചിത്രീകരിച്ചിരിക്കുകായാണ്.  ഈ ചിത്രങ്ങള്‍ ഇന്റര്‍സ്റ്റെല്ലാര്‍ സിനിമയിലെ ബ്ലാക്ക്ഹോളിനെ ഓര്‍മ്മപ്പെടുത്തും.

കടപ്പാട്: NASA’s Goddard Space Flight Center/Jeremy Schnittman

മുഴുവന്‍ ചിത്രങ്ങളും വീഡിയോകളും കാണാന്‍ ഈ ലിങ്ക് നോക്കുക. നാസയുടെ ഗോഡാര്‍ഡ് സ്പേസ് ഫ്ലൈറ്റ് സെന്ററിന്റെ സൈറ്റാണിത്. മുഴുവന്‍ ചിത്രീകരണവും ഇവിടെ ലഭ്യമാണ്.
https://svs.gsfc.nasa.gov/13326
---നവനീത്...

ചിത്രത്തിനു കടപ്പാട്: NASA’s Goddard Space Flight Center/Jeremy Schnittman

Comments