സ്പീക്കര്‍ കൊണ്ട് ഒരു വൈദ്യുതഫോണ്‍
വൈദ്യുത ഫോണ്‍
പണ്ടൊക്കെ അകലെയുള്ള ഒരാള്‍ക്ക് എന്തെങ്കിലും സന്ദേശം കൈമാറണമെങ്കില്‍ എന്തെല്ലാം പ്രശ്നങ്ങളായിരുന്നു നേരിടേണ്ടി വന്നത്. ഫോണിന്റേയും പ്രത്യേകിച്ച് മൊബൈല്‍ഫോണിന്റേയും വരവോടെ കഥയാകെ മാറി. ഇപ്പോ എന്തെളുപ്പം അല്ലേ?.. എന്തായാലും വൈദ്യുതി ഉപയോഗിച്ച് ആശയവിനിമയം നടത്തുന്നതിന്റെ ഒരു ലഘുരൂപം നമുക്ക് ഒന്ന് നിര്‍മ്മിച്ചു നോക്കാം.
ഇനി പറയുന്ന സാമഗ്രികള്‍ ഉടന്‍ ശേഖരിക്കാന്‍ നോക്കിക്കോളൂ..
1. സ്പീക്കര്‍ - 2 എണ്ണം ( വളരെ വലുതൊന്നും വേണ്ട. പഴയ ടേപ്പ് റിക്കാര്‍ഡറില്‍ നിന്നോ റേഡിയോയില്‍ നിന്നോ ഒക്കെ അഴിച്ചെടുത്തത് മതിയാകും. )
2. കണക്ട് ചെയ്യാനുള്ള ഇരട്ടവയര്‍ - 5 മീറ്റര്‍ (നീളം എത്ര കൂടിയാലും വിരോധമില്ല. കുറയണ്ട)
ഇനി എറ്റവും ഇഷ്ടമുള്ള ഒരു ചങ്ങാതിയെക്കൂടി കൂട്ടിക്കോളൂ..
വളരെ ലളിതമാണ് ഇനിയുള്ള പരിപാടികള്‍. സ്പീക്കറുകളെ പരസ്പരം കണക്ട് ചെയ്യണം. ഓരോ സ്പീക്കറിനും രണ്ട് ലീഡ് ഉണ്ടായിരിക്കും. അവയെ വയര്‍ ഉപയോഗിച്ച് ചിത്രത്തില്‍ കാണിച്ചിരിക്കുന്ന പോലെ ബന്ധിപ്പിക്കുക. അത്രയും ചെയ്തു കഴിഞ്ഞാല്‍ നമ്മുടെ ഫോണ്‍ റഡി. ഇനി ചങ്ങാതിയെ വിളിച്ച് ഒരു സ്പീക്കര്‍ കയ്യില്‍ കൊടുക്കുക. ആ സ്പീക്കര്‍ ചെവിയോട് ചേര്‍ത്ത് പിടിച്ച് ചങ്ങാതിയോട് അല്പം അകലെ നീങ്ങിനിന്നു കൊള്ളാന്‍ പറഞ്ഞോളൂ. ഇനി അടുത്ത സ്പീക്കര്‍ എടുത്ത് നിങ്ങളുടെ വായോട് ചേര്‍ത്ത് പിടിച്ച് സംസാരിച്ചു നോക്കൂ. നിങ്ങള്‍ പറയുന്നതെല്ലാം നിങ്ങളുടെ ചങ്ങാതിക്ക് സ്പീക്കറിലൂടെ കേള്‍ക്കാന്‍ കഴിയും. ചങ്ങാതിക്ക് തിരിച്ചും ഇതേ പോലെ തന്നെ സംസാരിക്കാം.
ഫോണൊക്കെ നിര്‍മ്മിച്ചു. ഇനി ഇതെങ്ങിനെയാണ് പ്രവര്‍ത്തിക്കുന്നത് എന്നും കൂടി അറിഞ്ഞോളൂ..
ഒരു സ്പീക്കറിന്റെ പ്രവര്‍ത്തനം ലളിതമാണ്. കാന്തികമണ്ഡലത്തിലിരിക്കുന്ന ഒരു കോയില്‍. കോയിലിലേക്ക് വൈദ്യുതി ചെല്ലുമ്പോള്‍ അത് ചലിക്കാന്‍ തുടങ്ങുന്നു. ഈ ചലനത്തെ ഒരു ഡയഫ്രത്തിലേക്ക് മാറ്റിയാല്‍ ശബ്ദം കേള്‍ക്കാം. ഇതാണ് ഒരു സ്പീക്കര്‍. ഇതേ സ്പീക്കറിന്റെ ഡയഫ്രം ചലിപ്പിച്ചാല്‍ പ്രവര്‍ത്തനങ്ങള്‍ നേരേ വിപരീതദിശയില്‍ നടക്കും. അതായത് കോയിലില്‍ അല്പം വൈദ്യുതി നിര്‍മ്മിക്കപ്പെടും. സ്പീക്കര്‍ തന്നെ മൈക്രോഫോണും ആകുമെന്ന് സാരം.
ഇനി നമ്മുടെ ഫോണിലേക്ക് വരാം. ഒരു സ്പീക്കറില്‍ കൂടി സംസാരിക്കുമ്പോള്‍ നിങ്ങളുടെ ശബ്ദത്തിനനുസൃതമായി ഡയഫ്രം ചലിക്കാന്‍ തുടങ്ങും. ഈ ഡയഫ്രവുമായി ബന്ധിപ്പിച്ചിരിക്കുന്ന കോയിലും ഇതേ പോലെ തന്നെ ചലിക്കും. അതോടെ കാന്തികമണ്ഡലത്തില്‍ ചലിക്കുന്ന കോയിലില്‍ ശബ്ദത്തിന് അനുസൃതമായ വൈദ്യുതിയും സൃഷ്ടിക്കപ്പെടും.
ഈ വൈദ്യുതി സ്പീക്കറുമായി ഘടിപ്പിച്ചിരിക്കുന്ന വയറിലൂടെ അടുത്ത സ്പീക്കറിലേക്ക് എത്തിച്ചേരും. അവിടെ വച്ച് ഈ വൈദ്യുതിയുടെ ഏറ്റക്കുറച്ചിലുകള്‍ക്കനുസരിച്ച് കോയിലും തുടര്‍ന്ന് ഡയഫ്രവും ചലിക്കാന്‍ തുടങ്ങും. ഡയഫ്രത്തിന്റെ ചലനം ശബ്ദമായി നിങ്ങളുടെ കാതില്‍ എത്തിച്ചേരുകയും ചെയ്യും. വൈദ്യുതകാന്തിക പ്രേരണം എന്നാണ് ഈ തത്വം അറിയപ്പെടുന്നത് എന്നു കൂടി അറിഞ്ഞോളൂ..
ഫോണ്‍പ്രവര്‍ത്തിക്കാന്‍ പുറമേ നിന്നും വൈദ്യുതിയുടെ ആവശ്യമില്ല എന്നൊരു ഗുണം കൂടി ഇതിനുണ്ട്. ചെവിയോട് ചേര്‍ത്ത് പിടിച്ചാല്‍ മാത്രമേ ശബ്ദം കേള്‍ക്കാന്‍ കഴിയൂ. കാരണം വളരെ ചെറിയ അളവിലുള്ള വൈദ്യുതിയാണ് സ്പീക്കറില്‍ രൂപപ്പെടുന്നത്. അതു കൊണ്ടു തന്നെ വളരെ നീളം കൂടിയ വയര്‍ ഉപയോഗിച്ചാല്‍ ശബ്ദത്തിന്റെ തീവ്രത കേള്‍ക്കാനാകാത്ത വിധം കുറയാന്‍ സാധ്യതയുണ്ട്.
ഇത്ര ലളിതമായി പുസ്തകങ്ങളിൽ പോലും കാണാൻ കഴിയില്ല..നന്ദി ടോട്ടോ
ReplyDeleteനന്ദി പോണി ബോയ്, ഇതും കൂടി കാണുക
ReplyDeletehttp://kizhakkunokkiyandram.blogspot.com/2010/05/blog-post_29.html
നവനീത്,ഈ ബ്ലോഗ് ഇന്നാണു കണ്ടത്. നന്നായിട്ടുണ്ട്. ലളിതമായി അവതരിപ്പിച്ചിരിക്കുന്നു കാര്യന്ങൾ. തുടരുക. അഭിനന്ദനന്ങൾ
ReplyDelete